J[ohannes], Dei gratia rex Anglie, dominus Hybernie, dux Normannie, Aquitanie et comes Andegavie, archiepiscopis, episcopis, abbatibus, comitibus, baronibus, justiciariis, vicariis et omnibus ballivis et fidelibus suis, salutem. Sciatis nos concessisse et presenti carta confirmasse ecclesie Sancte Trinitatis de Lentona et monachis ibidem Deo servientibus, in liberam perpetuamque elemosinam, quater viginti acras terre de essartis de Curtehala et molendinum de Blachelif in eschambium terre de Papelwika, quam rex Henricus, pater noster, dedit in liberam et perpetuam elemosinam canonicis de Novo Loco in Sirewda, quos ibi fundavit. Quare volumus et firmiter precipimus, quod predicta ecclesia de Lentona predictum molendinum et illas quater viginti acras de essartis de Curtehala habeant et teneant bene et in pace, libere et quiete, integre et plenarie et honorifice, cum omnibus pertinentiis et libertatibus et liberis consuetudinibus suis, et ita quod ille quater viginti acre sint libere et quiete de reguuardo nunc et in perpetuum. Concessimus etiam et hac carta nostra confirmavimus eisdem monachis de Lentona, pro salute nostra et heredum nostrorum et pro animabus regis, patris nostri, et H[enrici], regis, avi patris nostri, et antecessorum nostrorum, heremitagium de Kershala, cum omnibus pertinentiis suis, in liberam, puram et perpetuam elemosinam. Quare volumus et firmiter precipimus ut predicti monachi nostri libere et quiete in pace et honorifice teneant predictum heremitagium, sicut Hugo de Burun, monachus eorum, liberius et quietius tenuit. Concessimus etiam et hac carta nostra confirmavimus eisdem monachis unam feriam octo dierum ad festum sancti Martini, cum plenario theloneo de omnibus rebus, de quibus theloneum accipi potest, exceptis emptionibus illis quas de mensa vel vestitu eorum esse constiterit, quibus super hiis quietanciam concessimus et confirmavimus. Quare volumus et firmiter precipimus, quod nemo vendat vel emat in Notingham infra hos octo dies quibus feria durat, et ut omnes venientes ad feriam et redeuntes sint quieti ab omnibus querelis. Precipimus etiam ne vicecomes nec castellani de Notigham vexent predictos monachos in dravis bovum, nec in aliquo alio sicut solebant, set emant tali foro sicut alii venientes ad nundinas de longinquis partibus. Volumus etiam ut predicti monachi et res, et possessiones, et homines eorum liberi et quieti sint ab omni seculari servitio et exactione; et si quis versus (?) predictam domum aliquid de suis possessionibus clamaverit, sive eam in aliquo vexare vel in placito ponere voluerit, prohibemus ne pro aliquo respondeant neque in placito intrent, neque aliquis eam placitare faciat nisi coram nobis vel capitali justicia nostra. Hec omnia concessimus eis in perpetuam elemosinam pro animabus H. regis, proavi nostri, et H. regis, patris nostri, et antecessorum nostrorum, et pro nostra nostrorumque et omnium fidelium salute, sicut carte regis H. patris nostri, rationabiliter testantur. Testibus Gaufredo, filio Petri, comitis Essexie, Willelmo Briwere, H. Bardulfo, Hugone de Nevilla, Roberto, filio Rogeri, Simone de Patelhillo. Datum per manum Symonis, archidiaconi Wellensis, et Johannis de Gray, apud Wigorniam, sexto die aprilis, regni nostri anno primo.